بكرا العيـــــــد .... مش معنى كدا  اني فرحانه عشان  بكرا أجازة ولا  حاجه من دي خالص ..لا لا.... بكرا العيد ودا معناه ان طنط وعمو وأسماء جايين بكرا عشان دول اول ناس بيزورونا ويقولولنا كل سنه وانتوا  طيبين

بكرا العيد ...دا معناه اني بنام وانا  حاطه جنبي العباية الي اشتريتها عشان انزل اصلي  صلاة العيد  مع اسماء..وبعدها احضر طقم العيد الي جبناه سوا بس بلونين مختلفين عشان ننزل نلعب تحت سوا ونخرج بعد ما ملينا  شنطنا الصغنونه بالعيديه من بابا وعمو ..ورق جديد وبيلمع  ياااااا سلام .... وبعد ما  اتهد حيلنا طول اليوم برا , نطلع البيت عشان نستريح ونتعشى وتبدا المؤامرة....أنا واخواتي واسماء واخواتها قاعدين على الترابيزة بندبر الخطة لأهم حادث في حياتنا 

وبعد ما الكل يتشاور ونقرر نبدأ التنفيــــذ

داخلين على بابا وعمو في الصالون واحنا متحفزين وبنزق بعض مين فينا يدخل الاول ويتصدر  القعدة... عمو وبابا بيضحكوا  طول عمرهم كانو هارشين الحوار ومع ذلك  عمرهم محسسونا انهم  عارفين ولا احنا عمرنا  فهمنا

عايزين ايه يا عيال ؟؟ دخلتكم دي بربطة المعلم وراها حاجة اكيد ..قولوا قولوا ..

عايزين نروح دبي (حديقة الصفا بالذات ) او نروح العين  وياريت الهيلي

 عشان خاطري  يا بابا وعشان خاطري  يا عمو وبوسة من هنا على ضحكة من هنا ونسمع الموافقة وضحكات الانتصار تملى البيت طبعا ... وماما وطنط يعرفو الرد من وهما  قاعدين  جوا من صوتنا  بس  ويبداو  يحضروا  هيعملو ايه  غدا  ونحتاج ايه في  الخروجه ويقسموها 

في الناحيه التانيه  نكون احنا  قاعدين نخطط عشان نحضر اللعبه الفلانيه والكوتشينة والكورة  والمضارب وكل حاجه عشان  بكرا  واكيد  منامش من كتر فرحتنا مستنيين الفجر يطلع  عشان نبدا اليوم

وكان لازم  في نص الطريق نريح شوية عشان نبدل السيارات  يا إما  انا اروح اركب مع سياره عمو يا إما اسماء  تيجي معانا... يعدي اليوم واحنا طايرين من الفرح ونرجع البيت مالكين الدنيا في ايدينا 

******

دلوقتي  مبقاش في دبي  عشان مبقاش في عيد...ومبقاش في عيد عشان مبقاش في  طنط وعمو واسماء

وهما مبقوش موجودين عشان راحو مصر ..واحنا مش بنتقابل في مصر  عشان هما في القاهره واحنا في اسكندرية ..واحنا  خلينا المحافظتين بعاد اوي عن بعض عشان المسافه جوانا  بعدت 

والمسافه بعدت عشان احنا محاولناش نقربها ..واحنا محاولناش  نقربها عشان محسناش انها بعدت ومحسناش ببعدها عشان مبقيناش حاسين بحلاوة قربها 

وحلاوة قربها راحت عشان الناس اتغيرت ولما الناس اتغيرت ..دبي والعين اتغير موقعهم عالخريطه وبقوا  ابعد من الناس دي نفسها 

وانا نسيت العيد ونسيت الهدوم الجديده ونسيت صلاة الصبح في المسجد معاهم ونسيت نفسي وسط كل حاجة بس لسه فاكرة حاجه وحيدة 

إني لو ركبت معاهم السيارة دلوقتي هلاقي حد جديد جوا ..لابس دبلة مكتوب عليها اسماء في إيده اليمين  وساعتها اكيد  هضطر انزل من العربية ويقعد هوا مكاني ..وارجع تاني لعربية بابا

بس مش عارفه ليه  حاسه إنو هيكون مشي بيها قبل ما أوصله واركب